雪域之子

ས་འདི་འབྲོག་ས་སྨུག་པོ།།

རྩི་ཤིང་སྨན་སྣ་ལྡེམ་ས།།

མི་འདི་འབྲོག་མྱི་སྨུག་པོ།།

མཛའ་བརྩེའི་ཕྱི་ཐག་རིང་ས།།

མེས་པོའི་རུས་པའི་གཏིང་ལ།།

དཔའ་མཛངས་ལོ་རྒྱུས་བརྐོས་ཡོད།།

མདུང་ནག་རལ་བ་གསིག་པའི།།

ཕྱིང་དཀར་ཁྲབ་ཀྱི་བདག་པོ།།

ས་འདི་འབྲོག་ས་སྨུག་པོ།།

དཀར་ནག་ཕྱུགས་ཀྱི་གཡང་ར།།

མི་འདི་འབྲོག་མྱི་སྨུག་པོ།།

གཞུང་རྒྱུད་མདའ་ལས་དྲང་ས།།

བློ་ཕུག་མི་ལ་བརྟན་ན།།

སྡོང་གྲོགས་ལྷ་ཡིས་གནང་ཡོང་།།

རྒྱུ་འབྲས་རྒྱ་ཁ་སྲུང་བའི།།

དགེ་སྡུག་ལས་ཀྱི་བདག་པོ།།

ས་འདི་འབྲོག་ས་སྨུག་པོ།།

བསོད་ནམས་མཚོ་ལས་ཟབ་ས།།

མི་འདི་འབྲོག་མྱི་སྨུག་པོ།།

བློ་རྒྱ་མཁའ་ལས་ཡངས་ས།།

རང་གཤིས་དར་དཀར་ངོས་ལ།།

རང་ཚུགས་ཕྱག་ཐམ་ཕབ་ཡོད།།

དམ་ཚིག་དམ་ཁ་ཚ་བའི།།

སྲིད་པ་གངས་ཀྱི་བདག་པོ།།

དམ་ཚིག་དམ་ཁ་ཚ་བའི།།

སྲིད་པ་གངས་ཀྱི་བདག་པོ།།

དམ་ཚིག་དམ་ཁ་ཚ་བའི།།

སྲིད་པ་གངས་ཀྱི་བདག་པོ།།